144 ఏళ్ల క్రితం కేదార్‌నాథ్.. అరుదైన ఫొటో పంచుకున్న ఆనంద్ మహీంద్రా

2026 కేదార్‌నాథ్ యాత్ర ఘనంగా ప్రారంభమైంది. పరమశివుడి పవిత్ర క్షేత్రాల్లో ఒకటైన కేదార్‌నాథ్ ఆలయ ద్వారాలు శీతాకాలం తర్వాత తిరిగి తెరుచుకోవడంతో భక్తులు భారీ సంఖ్యలో తరలివస్తున్నారు. ఉత్తరాఖండ్‌లోని గర్వాల్ హిమాలయాల నడుమ కొలువైన ఈ శివయ్యను దర్శించుకునేందుకు వేలాది మంది భక్తులు కఠినమైన ప్రయాణాన్ని సైతం లెక్కచేయకుండా వస్తున్నారు. యాత్ర ప్రారంభమైన కొద్ది రోజుల్లోనే రికార్డు స్థాయిలో భక్తుల రద్దీ కనిపిస్తోంది.

ఈ నేపథ్యంలో ప్రముఖ పారిశ్రామికవేత్త ఆనంద్ మహీంద్రా, ఒకప్పటి కేదార్‌నాథ్ యాత్ర ఎలా ఉండేదో గుర్తుచేస్తూ ఆసక్తికరమైన పోస్ట్ చేశారు. ఆయన తన 'ఎక్స్' ఖాతాలో 1882లో తీసిన కేదార్‌నాథ్ ఆలయ అరుదైన ఫొటోను పంచుకున్నారు. ఇది కేదార్‌నాథ్‌కు సంబంధించిన అత్యంత పురాతన ఫొటోలలో ఒకటిగా భావిస్తున్నారు. ఈ ఫొటో తన దృష్టిని వెంటనే ఆకర్షించిందని ఆయన పేర్కొన్నారు.

ఈ ఫొటో తీసిన సమయంలో కేదార్‌నాథ్‌కు చేరుకోవడానికి సరైన రోడ్లు, రైలు మార్గాలు గానీ, హెలికాప్టర్లు గానీ అందుబాటులో లేవని మహీంద్రా తన పోస్ట్‌లో గుర్తుచేశారు. "హిమాలయాల ఒడిలో కొలువైన శివయ్య నిలయం" అంటూ కేదార్‌నాథ్‌ను అభివర్ణించిన ఆయన, ఆ రోజుల్లో యాత్రకు వెళ్లాలంటే అపారమైన సమయం, సహనం, అన్నింటికీ మించి దృఢమైన విశ్వాసం ఉండాలని అన్నారు. యాత్రికులకు అప్పట్లో గమ్యం కంటే ప్రయాణమే యాత్రలో కీలకమైన అనుభూతిని ఇచ్చేదని ఆయన వివరించారు.

ప్రస్తుతం సాంకేతికత పెరిగి, సౌకర్యాలు అందుబాటులోకి రావడం వల్ల ఎక్కువ మంది భక్తులు సులభంగా దర్శనం చేసుకోగలగడం మంచి పరిణామమేనని అంగీకరిస్తూనే, ఆయన ఒక ఆలోచన రేకెత్తించే ప్రశ్నను లేవనెత్తారు. "యాత్రలో నెమ్మదిగా ప్రయాణిస్తూ, ఆ ప్రయాణాన్ని ఆస్వాదించే తత్వాన్ని మనం కాపాడుకోవాల్సిన అవసరం లేదా?" అని ఆయన ప్రశ్నించారు. వేగం పెరిగిన ప్రస్తుత ప్రపంచంలో గమ్యం చేరడమే కాకుండా, ఆ ప్రయాణంలో లభించే అనుభవాన్ని కూడా మనం కోల్పోకుండా చూసుకోవాలనే సందేశాన్ని ఆయన తన పోస్ట్ ద్వారా పరోక్షంగా అందించారు.